UrbanV және Alatau Advance Air Group Alatau City-де әуе такси жүйесін іске қоспақ
Ынтымақтастық аясындағы алғашқы әрі ауқымды қадам - Alatau City-де сынақ орталығын жобалау. Бұл орталық eVTOL технологияларын ерте кезеңде сынау және көрсетуге арналған инфрақұрылымдық орынға айналады. Бұл бастама Қазақстан үшін инновациялық технологиялар мен тұрақты мобильділік саласында өңірлік орталық құру жолындағы маңызды кезең.
Еске сала кететін жағдай, 2025 жылдың қараша айында AAAG компаниясы әлемдік технологиялық көшбасшы Joby Aviation (АҚШ) компаниясымен келісімге қол қойған болатын. Осы компанияның eVTOL аппараттарын Alatau City мен Алматы қалалары арасында экологиялық таза әуе такси желісін құру үшін пайдалану жоспарлануда. Вертипорттар инфрақұрылымының жобасы бұл шешімдерді нақты іске асыруға мүмкіндік береді.
Alatau City-де сынақ орталығының құрылуы қаладағы жоғары технологиялық салаларда жаңа жұмыс орындарының пайда болуына ықпал етіп, тұрғындар мен бизнеске арналған жаңа көлік қызметтерінің пайда болуына негіз болады.
«Біз AAAG-пен қауіпсіз әрі экологиялық таза көлік инфрақұрылымын құруға бағытталған жоба аясында жұмыс істеп жатқанымызға қуаныштымыз. Қазақстан AAM-ның болашағына сеніммен инвестиция салып жатыр, ал UrbanV бұл өзгерістерді дамыту үшін өз халықаралық тәжірибесін пайдалануға дайын, - деп атап өтті UrbanV директорлар кеңесінің төрағасы Иван Бассато.
Жобаны іске асыруға Korea Airports Corporation (KAC) да шақырылды. 2025 жылдың қазан айында Сеул қаласында өткен Alatau Rise With Kazakhstan роуд-шоуы аясында Қазақстан Республикасының Көлік министрлігі, KAC және Alatau Advance Air Group Ltd (AAAG) арасында ынтымақтастық туралы меморандумға қол қойылды. Корей корпорациясының сараптамасы Alatau City инфрақұрылымына заманауи әуежай жүйесін басқару және жолаушылар ағынын тиімді ұйымдастыру бойынша үздік халықаралық тәжірибелерді енгізуге мүмкіндік береді.
UrbanV – болашағы зор әуе мобильділігі (AAM) саласындағы инфрақұрылымның халықаралық операторы, штаб-пәтері Рим қаласында орналасқан. Компания 2021 жылы авиация саласындағы жетекші көшбасшылардың консорциумы арқылы құрылды: Aeroporti di Roma (Рим), SAVE Group (Венеция), Aéroports de la Côte d’Azur (Ницца) және Aeroporto di Bologna (Болонья).
UrbanV eVTOL аппараттарына арналған вертипорттарды (тік ұшып-қонатын электрлі аппараттарға арналған алаңдар) жобалау, салу және пайдалану жұмыстарымен айналысады. 2022 жылы компания Римдегі Фьюмичино әуежайында Италиядағы алғашқы сынақ вертипортын ашып, инновациялық авиацияға арналған жерүсті инфрақұрылымын жасау бойынша әлемдік деңгейде алғашқы бастамашылардың біріне айналды.
Дереккөз: urbanv.com
